Print

ಮೆಜೂನ್ ಏಕ್ ಮಿನುಟ್ ಕಶೆಂ ಪಳೆಂವ್ ತುಕಾ?
ಪಾಯಾಂಗೋಳ್ ಪಳೆವ್ನ್ ಬಸನ್, ಲಜೆ ಕಾಂಟಿ ಜಾತಾಯ್
ಮುಖಾಮಳ್ ಚೊವುನ್ ರಾವಾನ್, ಸುರ್ಯಾಬರಿಂ ಪೆಟ್ತಾಯ್
ಮ್ಹಾಕಾ ಪಾಪಿಯಾಕ್
ಧಾಂಕಿವಿಣ್ಯಾ ವಾಲಿ ಜಶೆಂ ನಿತ್ರಾಣ್ ಕರುನ್ ಸೊಡ್ತಾಯ್!
ದೆಕುನ್ ಆಜೂನ್ ಘಂಟ್ಯಾನ್ ಘಂಟೇ
ತುಜಿ ಪಾಟ್ ಪಳೆತ್ ರಾವ್ಲಾಂ
ತಿತ್ಲ್ಯಾರ್ ಚ್ ಖುಶಿ ಪಾವ್ಲಾಂ!

ಮೆಜೂನ್ ತೀನ್ ಉತ್ರಾಂ, ಕಶಿಂ ಸಾಂಗುಂ ತುಜೆಲಾಗಿಂ?
ಮುಖಾಮುಖಿಂ ಉಲಯ್ತಾನಾ ಜೀಬ್ ಮಿಟಾಂ ಗಿಳ್ಟಾ
ಟೆಲಿಫೊನಾರ್ ಸಾಂಗುಂಕ್ ಗೆಲ್ಯಾರ್ ಬಾಪುಯ್ ತಾಳೊ ಪಿಳ್ಟಾ
ಮ್ಹಾಕಾ ಪಾಪಿಯಾಕ್
ಸೊಣಾಂತ್ಲ್ಯಾ ಪಾವ್ಳ್ಯಾಂಬರಿಂ ಜಿವೊ ಘಾಮ್ ಗಳ್ಟಾ!
ದೆಕುನ್ ಆಜೂನ್ ಕೊಂಕ್ಣಿ ಪತ್ರಾರ್
ಕವಿತಾಚ್ ಬರವ್ನ್ ರಾವ್ಲಾಂ
ತಿತ್ಲ್ಯಾರ್ ಚ್ ಖುಶಿ ಪಾವ್ಲಾಂ!

ಪೂಣ್ ಮ್ಹಜ್ಯಾ ಖುಶಿಯಾಂಕ್
ಮಿಶಿಯೊ ಫುಟ್ಚೆ ಆದಿಂ
ಪಾದ್ರಿನ್ ಕಾಳ್ಜಾರ್ ಕುರಾಡ್ ವೊಡ್ಲಿ
ತುಜಿ ಚೀಟ್ ವಾಚುನ್ ಸೊಡ್ಲಿ!

ತಿತ್ಲ್ಯಾ ಭಿತರ್ ಕಶೆಂಗೀ ಕೊಣ್ಣಾ
ತುಜ್ಯಾ ಪಾಟಿವಯ್ಲಿ ಮ್ಹಜಿ ಏಕ್ ನದರ್
ಆನಿ ಕೊಂಕ್ಣಿ ಪತ್ರಾವಯ್ಲಿ ಏಕ್ ಕವಿತಾ
ಜಟ್ಪಟ್ ಮೊಗಾರ್ ಪಡ್ಲಿಂ
ಕಾಜಾರಾ ಪಯ್ಲೆಂಚ್ ಕವಿತಾ, ಬಾಳಾಂತ್ ಜಾಲಿ!

- ಲೊಯ್ಡ್ ರೇಗೊ (2006)