ಹಾಂವ್ ತಾಚೊ ಮನಿಸ್
ತಾಕಾಚ್ ಶಿಕ್ಲಲೊ, ತಾಣೆಂಚ್ ಮಾಖ್ಲಲೊ
ತಾಚೊ ಮನಿಸ್ ಹಾಂವ್!
ತಾಕಾ ಜೊಕುನ್, ತಾಕಾ ವಿಕುನ್
ತಾಚ್ಯಾಚ್ ನಾಂವಾನ್ ಜಿವಿತ್ ಸಾರ್ಚೊ
ತಾಚೊ ಮನಿಸ್ ಹಾಂವ್!
ಪೂಣ್
ಶಿರಾಂದಾರಿಚ್ಯಾ ಪಾವ್ಸಾಕ್
ಡಾಮಾರಾ ರಸ್ತ್ಯಾರ್
ಲೊಳುನ್, ಪೋಟ್ ವೊಡುನ್
ಪಲ್ತಡಿ ಪಾವುಂಕ್ ವದ್ದಾಡ್ಚ್ಯಾ
ಕೊಟಾರ್ಲೆಬರಿಂ ಮ್ಹಜಿ ಜಿಣಿ!
ಹೆವ್ಶಿಲ್ಯಾನ್ ಪೊಕ್ರಿ ಚೆಡೆ
ಚಾಕ್ಲೆಬರಿಂ ಗುಟ್ಲಿ ಕರುಂಕ್
ಫಾತೊರ್ ಉಡಯ್ತಾತ್ ಮ್ಹಣ್ಚಿ ಭಿರಾಂತ್
ತೆವ್ಶಿಲ್ಯಾನ್ ಮಾಟ್ ಪಡ್ಲಲಿ
ಖಂಯ್ಚಿ ತರೀ ಹಡ್ಬಿ ಗಾಡಿ
ಪಾಟಿವಯ್ಲ್ಯಾನ್ ರೊದಾಂ ಗುಂವ್ಡಾವ್ನ್
ಸುಟಿ ಕರಿತ್ ಮ್ಹಣ್ಚಿ ಭಿರಾಂತ್!
ಭಿರಾಂತ್ ಉಬ್ಜಂವ್ಕ್ ಆಯಿಲ್ಲೊ ಹಾಂವ್
ಥೊಡೆಪಾವ್ಟಿಂ
ಭಿರಾಂತೆನ್ ಚ್ ಗುಟ್ಲಿ ಜಾತಾಂ!
- ಲೊಯ್ಡ್ ರೇಗೊ (2008)