ಮ್ಹಜ್ಯಾ ದೇಸಾಂತ್ ಆಜ್
ಸತಾಂಚಿ ಸುನ್ನತ್ ಜಾತಾ
ಫಟಿಂಚೆ ಘಾಂಟಿಕ್ ಕೊಂಡಮ್ ಶಿರ್ಕಾವ್ನ್
ನಿತಿಚೆರ್ ಸಂಭೋಗ್ ಚಲ್ತಾ
ತಾಂಬ್ಡ್ಯಾ ಗಲ್ಲೆಂತ್ಲೆ ಗಡ್ದೆಂತ್
ಪೊಂವುನ್ ವೆಚ್ಯಾ ಇರ್ಜನಾಬರಿಂ
ಕಾಯ್ದೆ ಕಾನೂನಾಂ ಪಾಜ್ರೊನ್ ವೆತಾತ್!
ಲೋಂಚಾಚೆ ಈದ್ರ್ ಪಿಯೆವ್ನ್
ಲೇಲೆ ಘಾಲುನ್ ಧಾಂವ್ತಾ, ಹ್ಯಾ ದೇಸಾಚೆಂ ಪೊಲಿಟಿಕ್ಸ್
ತಾಚೆ ಪಾಟ್ಲ್ಯಾನ್
ಪಾಂಯಾಂಕ್ ಕೇಸಾಂಚಿಂ ಝಾಂಟಾಂ ಶಿರ್ಕಲ್ಲ್ಯಾ
ಲೆಗೂನ್ ತಲ್ಕಾಂಪರಿಂ
ಕೋಡ್ತ್, ವಕೀಲ್ ಆನಿ ಪೊಲಿಸ್.
ನಿಮ್ಣೆ...
ಹ್ಯಾ ದೇಸಾಚೊ ಸಾದೊ ನಾಗರೀಕ್
ಹರ್ನಿಯಾ ಪಿಡೆಸ್ತಾಬರಿಂ!
ಇತ್ಲೆಂಚ್ ತರ್ ವ್ಹಡ್ ನಾ ಆಸ್ತೆಂ
ಆತಾಂತಾಂ, ಜಾತಿ ಮತಾಚ್ಯಾ ನಿಬಾನ್
ಮೊವಾಳ್ ಕಾಳ್ಜಾಂ ಪಾಸೂನ್
ಮಿತ್ತಲಾಚ್ಯಾ ಸ್ಟೀಲಾಬರಿಂ, ಧಾರುಣ್ ಜಾಲ್ಯಾಂತ್
ದೇವ್-ಧರ್ಮಾಚ್ಯಾ ಸೊರ್ಮುಣಾಂತ್
ಆಟೊನ್ ಪಿಗ್ಳೊನ್
ಮಾಸೂಮ್ ಮನಾಂ ಸಯ್ತ್
ಮಾಲ್ಯಾಚೊ ಸೊರೊ ಜಾಲ್ಯಾಂತ್...
ಮ್ಹಜಿ ಗಜಾಲ್ ಆಯ್ಕಾ...
ಹಾಂವ್ ಹ್ಯಾ ದೇಸಾಚೆ ಖಂತಿನ್
ಬುಡೊನ್, ಆಟೊನ್
ಕಂಗಾಲ್ ಜಾಲ್ಲೊ ಮನಿಸ್
ಆತಾಂ...
ಮಾನೆಸ್ತಾಂಕ್ ಡ್ರಗ್ಸಾಂತ್ ಬುಡೊವ್ನ್
ಗಿರೆಸ್ತಾಂಕ್ ಸೆಕ್ಸಾಂತ್ ನಿದಾವ್ನ್
ಗರೀಬಾಂಚಿ ರಕ್ಶಾ ಕರ್ಚೊ
ನಕ್ಸಲಾಯ್ಟ್!
- ಲೊಯ್ಡ್ ರೇಗೊ (2006)