Print

ಸತಾಂ

ಗುರು ಮ್ಹಣಾಲೊ ಶಿಸಾಂಲಾಗಿಂ, ತುಮಿ ಬರಯಾ
ಫಟಿಚ್ ಬರಯಾ
ಸಂಸ್ರಾಕ್ ಸತ್ ದಿಸ್ತಾ ಪರ್ಯಾಂತ್.
ಶಿಸ್ ಬರಯ್ತೇ ಗೆಲೆ...
ಸಂಸ್ರಾನ್ ಧ್ಯಾನ್ ಚ್ ದಿಲೆಂನಾ.
ಬಾವ್ಲೆಲೆಂ ಮುಸ್ಕಾರ್ ಘೆವ್ನ್ ಆಯ್ಲೆ
ಗುರುಲಾಗಿಂ...
ಗುರು ಅಮೊರ್ ಹಾಸ್ಲೊ, ಉಪ್ರಾಂತ್ ಮ್ಹಣಾಲೊ,
ತುಮ್ಚೆ ವಾಚ್ಪಿ ಕಾಲೆತಿಚೆ ನ್ಹಯ್
ತಾಂಕಾಂ ಸತಾಂ ಸಮ್ಜಾನಾಂತ್!

**********
ಜಿವಿತ್

ಕೇಸ್ ಆನಿ ಫುಲ್ ಮೊಗಾರ್ ಪಡ್ಲಿಂ.
ಕೇಸ್ ಮ್ಹಣಾಲೊ-ಅಗೋ ಫುಲಾ, ಪರ್ಮಳಾಂತ್ ತುಜ್ಯಾ ಮೊರ್ತಾಂ
ಫುಲ್ ಮ್ಹಣಾಲೆಂ- ಅರೇ ಕೆಸಾ, ಪಾಸಾಂತ್ ತುಜ್ಯಾ ಬಾವ್ತಾಂ...
ದೊಗಾಂಯ್ಚ್ಯಾ ಮೊರ್ನಾಂತ್ ಸೊಬಾಯ್ ಜಿಯೆಲಿ!

**********
ನೀತ್

ನೀತ್ ದಿಂವ್ಚ್ಯಾ ಆದ್ಲ್ಯಾ ದಿಸಾ, ಸಗ್ಳೆ ಸಗ್ಳ್ಯಾಂಕ್ ದುರ್ಸಾತಾಲೆ.
ಕೋಣ್ ಹಿಂದ್ವಾಂಕ್, ಕೋಣ್ ಮುಸ್ಲಿಮಾಂಕ್
ಕೋಣ್ ಸರ್ಕಾರಾಕ್, ಕೋಣ್ ಮೀಡಿಯಾಕ್...
ಉಪ್ರಾಂತ್ ಬಂದ್ ಜಾಂವ್ಚಿ, ಗಲಾಟೊ ಜಾಂವ್ಚಿ, ಗಾಬ್!
ನೀತ್ ದಿಲಿ!
ಸಗ್ಳೆಂ ಶಾಂತ್... ಸಗ್ಳೆ ಭಾಯಿ ಭಾಯಿ
ಹೆಂ ಪಳೆವ್ನ್ ನಿತಿಕ್ ಯಿ ಭಿರಾಂತ್ ದಿಸ್ಲಿ!

**********
ಭ್ಯೆಂ!

ತೊ ಆಮಾಲಾ ಬಗಾರ್ ಘಡಿ ಪಾಸುನ್ ಜಿಯೆನಾ.
ತಶೆಂ ಮ್ಹಣ್, ಪಿಡಾ ಆಯ್ಲ್ಯಾರ್ ಮೊರ್ನಾ ಭಿಂಯಾನ್ ಪಿಯೆನಾ.
ತ್ಯಾ ದಿಸಾ ಪಿಡಾ ಚಡ್ ಜಾಲಿ.
ದಾಕ್ತೆರ್ ಮ್ಹಣಾಲೊ- ಕಾಂಯ್ ಇಲ್ಲೆಂ ಪಿಯೆಂವ್ಕ್ ದಿಯಾ
ನಾ ತರ್ ತೊ ವಾಂಚಾನಾ.
ತಾಂಣಿ ದಿಲೊ, ತೊ ಪಿಯೆಲೊನಾ...

**********
ಅಂತ್ಯ್

ಮುಳಾಂತ್, ಆಳೆಂ ಸೊಡಂವ್ಚ್ಯಾ ರಯ್ತಾ ತಕ್ಲೆರ್ ಕೆಂಳ್ಬ್ಯಾನ್ ಬೊಂಡಿ ಝಡಯ್ಲಿ.
ರಯ್ತ್ ಮೆಲೊ...
ದುಸ್ರೆ ಸಾಕಾಳಿಂ ದಿಸಾಳ್ಯಾಂಚೆರ್ ದಾಟ್ ಅಕ್ಶರಾಂನಿ ಖಬರ್ ಛಾಪುನ್ ಆಯ್ಲಿ.
ಕೆಂಳ್ಬೊಯಿ ಬಂಡ್ವಾಳ್ ಶಾಹೀ ಜಾಲಾ!

- ಲೊಯ್ಡ್ ರೇಗೊ